Andrés Kristjánsson kláraði krabbameinsmeðferð á krabbameinsdeild Heilbrigðisstofnunar Suðurlands á Selfossi fyrr í mánuðinum. Til marks um áfangann hringdi hann nýju gullbjöllunni hressilega að viðstöddu starfsfólki sem hefur fylgt honum í gegnum meðferðina síðastliðin tvö ár.
Hringingin markar tímamót á HSU því Andrés er fyrstur til að hringja bjöllunni, en henni er hringt eftir að krabbameinsmeðferð hefur formlega lokið.
Krabbameinsfélag Árnessýslu færði krabbameinsdeild HSU bjölluna að gjöf á dögunum og hefur hún fengið sérstakan sess á göngudeild HSU.
Í tilkynningu frá Krabbameinsfélag Árnessýslu segir að þar á bæ voni fólk að bjallan verði mörgum áminning um seiglu, hugrekki og von – og gefur þeim sem ljúka meðferð tækifæri til að fagna þessum mikilvægu tímamótum.