Fyrstu stálbitunum í nýju Ölfusárbrúna hefur verið skipað upp í Þorlákshöfn og hefst flutningur þeirra á verkstað í kvöld.
Stálbitarnir eru framleiddir í verksmiðjum Norvik í Póllandi og með fyrsta skipi kom um það bil helmingur af þeim bitum sem fara í burðargrind brúarinnar. Bitunum verður stillt upp á verkstað austan við ána og í framhaldinu hefst vinna við samsetningu brúarinnar. Gert er ráð fyrir að starfsfólki á svæðinu fjölgi úr 40 í 60 vegna þessarar vinnu.
Flutningarnir frá Þorlákshöfn munu standa yfir 8.-9. apríl og 13.-15. apríl. Gert er ráð fyrir einni ferð á kvöldi, en minni einingar verða fluttar yfir daginn. Áætlaður ferðatími frá Þorlákshöfn að Selfossi er frá klukkan 20 til miðnættis.
Farmurinn verður fluttur frá Þorlákshöfn um Óseyrarbrú, upp Eyrarbakkaveg og í gegnum Selfoss á Hólastekk og Suðurhólum. Þaðan inn á Gaulverjabæjarveg og að verkstað við Ölfusá.
Vegfarendur eru hvattir til að skipuleggja ferðir sínar með hliðsjón af framangreindu og um leið beðnir um að sýna sérstaka aðgát á meðan á flutningum stendur og virða merkingar og leiðbeiningar starfsmanna.