Samfélagsverkefnið Voices of Vík: Language, Culture & Community er fyrsti styrkþeginn úr Hörpusjóði, nýjum samfélagssjóði Samtaka sunnlenskra sveitarfélaga.
Styrkurinn var afhentur á aðalfundi SASS, sem haldinn var í Þorlákshöfn á dögunum og veitti Ann Irene Peters honum viðtöku.
Hörpusjóðurinn er nýr samfélagssjóður sem SASS setti á laggirnar til minningar um Hörpu Elínu Haraldsdóttur, fyrrum forstöðumanns Kötlusetursins í Vík í Mýrdal, en Harpa var ötull talsmaður þess að taka vel á móti nýjum íbúum og draga fram það sem sameinar fólk á hverjum stað.
Markmið sjóðsins er að styðja við félagslega og menningarlega aðlögun nýrra íbúa á Suðurlandi, óháð þjóðerni, tungumáli eða bakgrunni og auka samheldni og gagnkvæman skilning milli nýrra og rótgróinna íbúa.
Voices of Vík þótti fanga þennan kjarna en verkefnið er hannað til að styrkja tengsl, þátttöku og tilfinningu fyrir því að tilheyra í hinu fjölmenningarlega samfélagi í Vík í Mýrdal. Á tímabilinu ágúst 2026 til júlí 2027 verður staðið fyrir fjölmörgum viðburðum þar sem markmiðið er að efla samskipti milli íbúa með íslenskan og erlendan bakgrunn, draga úr félagslegri einangrun og auka samfélagslega samkennd.
Alls bárust þrettán metnaðarfullar umsóknir í sjóðinn að þessu sinni en styrkupphæðin er ein milljón króna.