Í dag var tekin fyrsta skóflustungan að nýju þjónustuhúsi Landsvirkjunar á Hellu. Í húsinu mun starfsfólk Enercon, framleiðanda vindmyllanna í Vaðölduveri, hafa aðstöðu. Landsvirkjun verður sömuleiðis með starfsstöð í húsinu og jafnframt verður þar verkstæði og geymsla fyrir varahluti í vindmyllurnar.
Ásbjörg Kristinsdóttir, framkvæmdastjóri framkvæmdasviðs hjá Landsvirkjun, Eggert Valur Guðmundsson, oddviti Rangárþings ytra og Magnús Þór Magnússon, framkvæmdastjóri verktakans Aleflis, tóku fyrstu skóflustunguna.
„Þetta verkefni er mikilvægt fyrir atvinnuuppbyggingu í sveitarfélaginu bæði eftir að byggingaframkvædum lýkur, og einnig mun þessi framkvæmd hafa jákvæð samfélagsleg áhrif á byggingatímanum hjá þjónustuaðilum og iðnaðar og verkamönnum,“ sagði Eggert Valur í samtali við sunnlenska.is.
„Lóðin er stór og býður í framtíðinni uppá mikla möguleika til stækkunar, samstarf sveitarfélagsins við Landsvirkjun hefur verið mjög gott, og við væntum mikils af þeirra starfsemi hér í nágrenninu samfélaginu okkar til góða,“ bætti Eggert Valur við.
Þjónustuhúsið rís á lóð Landsvirkjunar við Faxaflatir 2. Verktakafyrirtækið Alefli bauð lægst í verkið, en heildarkostnaður er áætlaður um 500 milljónir króna. Gert er ráð fyrir að húsið verði risið haustið 2027, þegar Vaðölduver verður komið í fullan rekstur.
Vindmylluframleiðandinn Enercon hefur þegar ráðið íslenskt starfsfólk sem hefur fengið umfangsmikla starfsþjálfun víða um Evrópu til að geta sinnt viðhaldi vindmyllanna 28 sem verða í Vaðölduveri. Samkvæmt samningi Landsvirkjunar við Enercon sér síðarnefnda fyrirtækið um viðhald á vindmyllunum fyrstu 15 árin sem vindorkuverið verður í rekstri.
