Í gær var tekin fyrsta skóflustungan að nýrri björgunarmiðstöð við Þinggerði á Borg í Grímsnesi. Um er að ræða byltingu fyrir viðbragðsaðila á svæðinu og er miðstöðinni ætlað að bæta aðstöðu og viðbragðsgetu þeirra.
Í nýja húsnæðinu munu Brunavarnir Árnessýslu og Hjálparsveitin Tintron hafa aðstöðu sína en byggingin verður rúmir 1.100 fermetrar og mun hún hýsa bæði tækjakost og aðstöðu fyrir starfsemi viðbragðsaðila. Framkvæmdin er samstarfsverkefni Brunavarna Árnessýslu, Tintron og Grímsnes- og Grafningshrepps.
Að sögn Péturs Péturssonar, slökkviliðsstjóra, mun nýja björgunarmiðstöðin styrkja viðbragð á svæðinu, sem er mikilvægt, ekki síst í ljósi fjölgunar íbúa og aukins fjölda ferðamanna og sumarhúsa á svæðinu.
Framkvæmdir hefjast nú þegar en stefnt er að því að byggingin verði tekin í notkun fyrir lok ársins.
