Síðastliðinn föstudag var fyrsta skóflustungan tekinn að nýjum leiguíbúðum sem Bjarg íbúðafélag byggir á Hvolsvelli. Um er að ræða fjórar íbúðir í raðhúsi við Hallgerðartún.
Íbúðirnar eru rúmir 90 fermetrar í sérbýli með litlum garði og allar íbúðir með tveimur bílastæðum. Áætlað er að þær verði tilbúnar í apríl á næsta ári. Verktaki verksins er Eðalbyggingar og SG hús á Selfossi.
Bjarg íbúðafélag er húsnæðissjálfseignarstofnun stofnuð af ASÍ og BSRB. Félagið er rekið án hagnaðarmarkmiða og er ætlað að tryggja tekjulágum fjölskyldum á vinnumarkaði aðgengi að öruggu íbúðarhúsnæði í langtímaleigu.
Bjarg kynnti hugmyndir sínar við sveitarstjórn í byrjun árs 2022 og fengu þær góðar undirtektir en Rangárþing eystra kemur að verkefninu með stofnframlagi í formi láns ásamt því að úthluta lóð fyrir verkefnið.
Opnað verður fyrir umsóknir um leiguíbúðirnar í september.