Þorbjörg Gísladóttir sveitarstjóri Mýrdalshrepps og Bergný Ösp Sigurðardóttir leikskólastjóri tóku í vikunni fyrstu skóflustunguna að nýjum leikskóla í Vík í Mýrdal.
Þetta markar upphaf framkvæmda sem gert er ráð fyrir að ljúki á seinni hluta árs 2023. Leikskólabyggingin verður 685 m² og mun leikskólinn rúma 60 börn en í hönnun er gert ráð fyrir að auðvelt verði að stækka hann í framtíðinni. Áætlaður kostnaður við bygginguna og fullbúna leikskólalóð er 574 milljónir króna.
„Vel er vandað til verka við hönnun og horft til framtíðar. Lögð er áhersla á góða hljóðvist, viðhaldslitla byggingu og rúmt leiksvæði, einng er lögð sérstök áhersla á aðstöðu fyrir starfsmenn og utanaðkomandi sérfræðinga. Gert er ráð fyrir verulegri stækkun á leikskólalóð sem verður vel búin af leiktækjum og leiksvæðum, m.a. gert ráð fyrir sérstöku leiksvæði fyrir yngstu börnin. Við hönnun á leikskólalóð er sérstaklega horft til þess að skapa skjólgott svæði,“ segir í tilkynningu frá Mýrdalshreppi. Byggingin er til marks um áherslu sveitarstjórnar á að byggja upp heilsueflandi og fjölskylduvænt samfélag.
Mikil þörf er á fjölgun leikskólaplássa í Mýrdalshreppi þar sem fæðingar hafa sjaldan verið fleiri en undafarin tvö ár og biðlisti eftir leikskólaplássi sífellt að lengjast. Um helmingur íbúa sveitarfélagsins er á aldrinum 20 til 39 ára og því allar líkur á því að fæðingum haldi áfram að fjölga á næstu árum.