Fyrsta rafmagnsrútan sem pöntuð hefur verið til Íslands af hálfu Guðmundar Tyrfingssonar / GTS ehf er lögð af stað til Íslands sjóleiðina frá Kína. Bifreið þessi mun verða í akstri á milli Reykjavíkur og Leifsstöðvar.
Strax á næsta ári er stefnt að því að mun fleiri rafmagnsrútur komi inn á þessa leið af hálfu fyrirtækisins og að flutningsgetan verði aukin verulega.
Benedikt Guðmundsson, einn eigenda GTS ehf, segir að verkefnið hafi verið lengi í burðarliðnum en þrátt fyrir jákvæðar viðtökur starfsmanna Isavia þá hefur Isavia enn ekki veitt félaginu formlegt leyfi fyrir aðstöðu í Leifsstöð. Forsvarsmenn félagsins eru hinsvegar sannfærðir um að félagið fái sambærilega aðstöðu fyrir rafmagnsvagna eins og önnur félög hafa fengið fyrir hefðbundnar disel rútur.
„Verkefnið er stórt skref í þá átt að þróa umhverfisvænari samgöngur á Íslandi og auðvelda stjórnvöldum að ná markmiðum sínum í tengslum við skuldbindingar Parísarsáttmálans um að draga úr mengun,“ segir Benedikt.
Rafmagnsrútunar sem um ræðir eru framleiddar af fyrirtækinu Yutong sem er stærsti rútuframleiðandi í heiminum í dag og framleiðir árlega um 70.000 rútur og strætisvagna. Yutong hefur framleitt þúsundir rafmagnsvagna og hefur meðal annars sett af stað verkefni með rafmagnsvagna í París, höfuðborg Frakklands.
Á leið sinni til Íslands mun rafmagnsrútan fyrst fara á sýningu hjá Yutong Eurobus ehf sem haldin er þann 18. – 20. október í Gautaborg í Svíþjóð.
„Strax að sýningu lokinni mun bifreið þessi koma til Íslands sem jákvætt innlegg í rafbílavæðingu landsins og umhverfisvænar samgöngur,“ bætir Benedikt við.