Fyrsta öryggismyndavélin tekin í notkun

Ný öryggismyndavél á vegum Sveitarfélagsins Árborgar við bæjarmörkin hjá Biskupstungnabraut var tekin í notkun í dag.

Vélin sýnir þjóðveg 1, til og frá Selfossi, og er ætlað að vera hjálpartæki fyrir lögregluna til að þekkja bíla sem gæti m.a. hafa sést til við innbrot.

Það voru Ásta Stefánsdóttir, framkvæmdastjóri Árborgar og Ólafur Helgi Kjartansson, sýslumaður, sem vígðu vélina formlega en myndir úr henni sjást einungis í tölvu sem staðsett er á lögreglustöðinni á Selfossi.

Ætlunin er að setja upp fleiri myndavélar í sveitarfélaginu á næstu mánuðum en þær verða allar staðsettar við innkomur inn í þéttbýliskjarnana.