Fyrir skömmu opnaði Apótekarinn að Smiðjuvegi 7 í Vík í Mýrdal. Með tilkomu Apótekarans hafa Mýrdælingar eignast sitt fyrsta alvöru apótek en til þessa hefur lyfsala farið fram á heilsugæslunni í Vík.
Apótekarinn er staðsett í glænýju húsnæði sem Penninn ehf. byggði en húsnæðið þykir mikil lyftistöng fyrir Mýrdælinga. Húsið hýsir einnig Pennann-Eymundsson og ráðhús Mýrdalshrepps, það er alls 1.023 fm og hefur Apótekarinn 100 fm af því til umráða.
1.000 manns á fyrstu dögunum
„Við erum með mjög sterkt net af apótekum á Suðurlandi og Vík var frábær viðbót. Við fengum veður af uppbyggingu Pennans á glæsilegu húsnæði í Vík sem er bæði hentugt í skipulagi og vel staðsett upp á umferð. Vöxtur ferðaþjónustu hefur verið gríðarlegur á svæðinu og ákveðinn miðpunktur á Suðurlandinu,“ segir Edda Hermannsdóttir, forstjóri Apótekarans, í samtali við sunnlenska.is.
„Okkur fannst því bæði spennandi að geta boðið upp á þjónustu fyrir ferðalanga en ekki síður fyrir heimafólk. Það hefur verið góð lyfjaafgreiðsla á svæðinu en okkur fannst mjög ánægjulegt að Apótekarinn yrði fyrsta apótekið í sveitarfélaginu.“
„Viðtökurnar hafa verið frábærar. Ég fékk að standa fyrstu vaktina með okkar fólki og það var virkilega gaman að hitta íbúa á svæðinu sem tóku apótekinu fagnandi. Við höfum fengið hátt í 1.000 manns til okkar á þessum fyrstu dögum og hlökkum til að taka vel á móti bæði íbúum og ferðalöngum,“ bætir Edda við.
Stuðla að bættri líðan
Hjá Apótekaranum fást bæði lyf og vörur sem efla heilsu almennt. „Við sjáum fram á að bæta enn frekar vöruvalið hjá okkur og þróa það með íbúum á svæðinu. Með tilkomu apóteksins eru því komnar til sölu vörur sem hafa ekki verið til sölu áður á svæðinu og stuðla að bættri líðan. Við erum einnig með gott framboð af íslenskum vörulínum sem við teljum að nýtist bæði íbúum en ekki síður ferðamönnum sem hafa áhuga á íslenskri framleiðslu.“
Enn sem komið er Apótekarinn einungis með opið á virkum dögum frá klukkan 10-17 en Edda segir að vel komi til greina að hafa apótekið einnig opið um helgar. „Við erum að fylgjast vel með umferð í apótekið og munum endurskoða opnunartímann og fjölda daga þegar aðeins meiri reynsla er komin.“
Einstakt útsýni
„Það var virkilega gaman að koma að opnun apóteksins en þetta er í fyrsta sinn sem ég sjálf tek þátt í opnun á apóteki. Starfsfólkið var mjög samhent í því að keyra til Víkur og vinna hratt og örugglega að hönnun, vöruvali, uppsetningu og röðun. Ég var dyggur starfsmaður í að fjarlægja rusl og setja saman húsgögn – og að reyna að vera ekki fyrir. Eitt er víst að úr apótekinu er einstakt útsýni og líklega eitt það fallegasta af apótekunum okkar!“ segir Edda kát að lokum.
