Sunnlenska popphljómsveitin Á móti sól fagnar 30 ára starfsafmæli um þessar mundir. Í tilefni af afmælinu heldur þessi ástsæla hljómsveit tvenna afmælistónleika í Háskólabíó, dagana 16.-17. október.
„Við hlökkum mikið til afmælistónleikanna. Það eru nokkur ár síðan við byrjuðum að setja niður hugmyndir að þessum tónleikum og gaman að draumurinn sé loksins að rætast,“ segir Heimir Eyvindarson, stofnandi Á móti sól, í samtali við sunnlenska.is.
„Við hlökkum mest til að spila með öllu aðstoðarfólkinu okkar, Halldóri Smárasyni, Gunnari Leó Pálssyni, Vigni Snæ Vigfússyni og söngdívunum frá Selfossi; Kristínu Örnu Hauksdóttur og Bryndísi Erlingsdóttur. Það verður gaman að spila lögin okkar með því frábæra fólki, við bestu mögulegu aðstæður.“
Óendanlega þakklátir
Heimir segir að þessi 30 ár hafa verið allskonar. „Við byrjuðum smátt og nutum í upphafi stuðnings úr okkar góða nærsamfélagi, til dæmis hjá Einari Björns, Guðmundi Tyrfingssyni, Braga Sverris og fleiri góðum mönnum. En svo jukust vinsældirnar smám saman og frá 2001-2010 snerist lífið að stórum hluta um að spila á böllum og semja og gefa út músík.“
„Seinni hlutinn á ferlinum hefur verið miklu rólegri, við höfum gefið út kannski 1-2 lög á ári og spilað sirka einu sinni í mánuði að meðaltali. Enda orðnir vel fullorðnir. En við erum svo ótrúlega heppnir að mörg lögin hafa fengið góðar viðtökur og það heldur okkur á tánum. Við erum óendanlega þakklátir fyrir það.“
Frábær félagsskapur
Aðspurður hver sé galdurinn við að að ná svona háu starfsafmæli segir Heimir það vera einhverja blöndu af heppni og væntumþykju. „Og svo einhverri blöndu af þroska og auðmýkt eftir því sem árin líða. Fyrst og fremst erum við allir mjög góðir vinir. Við Þórir höfum verið óaðskiljanlegir frá því við hittumst fyrst fyrir utan Daddabúð og byrjuðum að spjalla um tónlist og hinir strákarnir eru næstum alveg eins skemmtilegir og við,“ segir Heimir og glottir út í annað.
„Þetta er frábær félagsskapur. Við erum auðvitað ekkert alltaf sammála um allt, enda gerist voða lítið óvænt og skemmtilegt ef allir hugsa eins. Ég held samt að við séum allir sammála um það að Þórir er límið og hjartað í bandinu. Það fer ekki alltaf mikið fyrir honum, en hann er aðalkallinn.“
Svo skiptir það auðvitað máli að þetta hefur heilt yfir gengið ágætlega hjá okkur. Það hvarflaði allavega ekki að okkur þegar við spiluðum kauplaust heilt sumar til að borga fyrstu plötuna, sem var gefin út í 500 eintökum – og sirka helmingurinn ennþá óseldur – að 30 árum síðar ættum við fjórar gullplötur og eina platínu upp á vegg og fólk væri ennþá að hlusta á lögin okkar. Hvað þá að fólk myndi mæta á tónleika þar sem við spilum eingöngu okkar eigin lög. Við erum algerir forréttindapésar, þakklátir og auðmjúkir pésar.“
Fjölskylduvænna að spila á tónleikum
En fá menn aldrei leið á hverjum öðrum eða þá öllu tilstandinu sem fylgir því að gigga? Langar þig til dæmis aldrei að leggjast frekar upp í rúm með góða bók frekar en að spila á balli fram eftir nóttu?
„Jú, það verður að viðurkennast að við vorum orðnir svolítið útkeyrðir þegar við tókum fyrstu og einu pásuna okkar árið 2010. En eftir nokkurra mánaða hvíld vorum við farnir að iða í skinninu að byrja aftur. Það var samt kannski helst á næstu árum eftir það, kannski til 2015-16, sem það kom alveg fyrir að maður hefði frekar valið bókina,“ segir Heimir og brosir.
„En einhvern tímann á þessum árum, líklega 2016, tókum við þá góðu ákvörðun að minnka ballspileríið og reyna frekar að vinna fyrir okkur með því að spila á tónleikum. Við spilum eitt og eitt ball af og til og finnum alveg að það er ennþá gaman, en við erum náttúrulega orðnir gamlir kallar og það er ansi gott að geta klárað giggin fyrir miðnætti. Og töluvert fjölskylduvænna en að spila fram á rauða morgun eins og oft var þegar við spiluðum sem mest.“
Bara litlir strákar úr sveitinni
Heimi óraði alls ekki fyrir því að 30 árum eftir stofnun hljómsveitarinnar að myndu þeir halda risatónleika í Háskólabíói „Þetta átti bara að vera árshátíða- og pöbbaband. Hápunkturinn til að byrja með var að spila í Gjánni og Gauk á Stöng. En svo bara vatt þetta upp á sig – og hingað erum við komnir.“
„Tilfinningin að eiga 30 ára afmæli er dálítið óraunveruleg. Við erum bara litlir strákar úr sveitinni sem langaði að spila tónlist. Við erum auðmjúkir og þakklátir og um leið pínu stoltir. Þetta var allskonar basl fyrstu árin, en það var svo sannarlega þess virði.“
Engir meikdraumar inn í myndinni
Eftir þennan örlagaríka fund fyrir utan Daddabúð fengu Heimir og Þórir æfingaaðstöðu í Gagnheiðinni, haustið´95.
„Fljótlega var Golli, sem var trommari á undan Stebba, kominn með sett þangað inn. Svo bættust Björgvin Jóhann söngvari og Sæmundur gítarleikari í hópinn. Það var samt ekki fyrr en vorið ´96 sem við byrjuðum að spila opinberlega.“
„Markmiðið var bara að spila fyrir einhvern smá pening, það voru engir meikdraumar inni í myndinni eða neitt svoleiðis. Sumarið ´97 þegar fyrsta lagið okkar, Djöfull er ég flottur, varð vinsælt þá vorum við orðin sex í bandinu. Jóhanna Ýr Jóhannsdóttir söngkona hafði bæst í hópinn og það var orðið ágætt að gera hjá okkur. Á þeim tíma sáum við í sjálfu sér ekkert stærra og meira fyrir okkur. En svona getur lífið verið óútreiknanlegt.“
Enn eitt sólarbandið
Sagan á bak við nafnið á hljómsveitinni er heldur skondin. „Það var í rauninni algjört klúður. Þórir segist ekki þekkja neinn sem er jafn fljótur að fá leið á hlutum og ég og eitt af því sem ég var alveg búinn að fá nóg af á þessum tíma var soul tónlist. The Commitments myndin hratt af stað mikilli soulbylgju ´91 og við Þórir höfðum báðir verið í böndum sem spiluðu fullt af skemmtilegum soul lögum, en fimm árum seinna fannst mér þetta orðið ansi þreytt þannig að fyrsta útgáfa nafnsins var Á Móti Soul. Þannig er nafnið skrifað á fyrsta plakatinu. En við breyttum soul fljótlega í sól og urðum enn eitt sólarbandið.“
Aðspurður út í uppáhalds lagið þeirra segir Heimir að honum þyki vænt um þau öll. „En ég er stoltastur af laginu Verst að ég er viss af plötunni 8. Það varð ekkert sérstaklega vinsælt, en mér finnst það vel heppnað. Þó ég segi sjálfur frá.“
Eiga traustan aðdáendahóp
Heimir segir að það sem einkennir aðdáendur Á móti sól sé að þetta sé frábært fólk með vandaðan tónlistarsmekk.
„Það er samt eitthvað svo fullorðins að tala um aðdáendur, við höfum aldrei verið neinar stjörnur svo það sé alveg á hreinu. En við eigum traustan hóp sem fylgir okkur, hefur keypt plöturnar okkar og mætt á tónleika og böll. Það eru alltaf einhver kunnugleg andlit í salnum, sem er þægileg tilfinning. Við stöndum í mikilli þakkarskuld við þau öll og ætlum að gera okkar allra besta til að gleðja þau á afmælistónleikunum,“ segir Heimir kátur að lokum.
Uppselt er á tónleikana 16. október en enn eru nokkrir miðar lausir á aukatónleikana 17. október. Hægt er að nálgast miða inn á Tix.is.
