Fyrri áfanga brúarsmíðinnar lokið

Brúin tengir saman Rangárþing ytra og Skeiða- og Gnúpverjahrepp. Ljósmynd/Landsvirkjun

Fyrri áfanga af tveimur við nýja göngu- og reiðbrú yfir Þjórsá við Búrfell lauk núna skömmu fyrir jól en framkvæmdir hófust þann 18. október sl.

Það er Landsvirkjun sem kostar framkvæmdina sem unnin er í góðu samstarfi við sveitarfélögin Rangárþing ytra og Skeiða- og Gnúpverjahrepp. Ístak er framkvæmdaaðili.

Seinni áfanginn er að koma stálbitabrúnni á brúarstöplana en notað verður íslenskt límtré í brúargólfið. Stálið er framleitt í Póllandi og er reiknað með því til Þorlákshafnar seinnipart marsmánuðar ef allt gengur eftir.

Áætlað er að brúin verði tilbúin um miðjan júní á þessu ári og verður hún kærkomin viðbót við ferðamöguleika á svæðinu.