Vinnumálastofnun stendur fyrir Fyrirmyndardeginum í þriðja sinn á Suðurlandi föstudaginn 24. nóvember.
Upphaflega hugmyndin um þennan sérstaka dag er að írskri fyrirmynd. Þar hafa samtök Atvinnu með stuðningi innleitt Job Shadow day með góðum árangri. Markmið dagsins er að fyrirtæki og stofnanir bjóði atvinnuleitendum með skerta starfsgetu að vera gestastarfsmenn fyrirtækisins í einn dag. Með því fá gestastarfsmenn innsýn í fjölbreytt störf og starfsmenn fyrirtækja kynnast styrkleikum atvinnuleitenda með skerta starfsgetu.
Í tilkynningu frá Vinnumálastofnun segir að Fyrirmyndardagurinn sé mikilvægur liður í því að auka möguleika fólks á fjölbreyttri atvinnuþátttöku.
Fyrirtæki á Suðurlandi hafa verið mjög jákvæð um þátttöku og meðal fyrirtækja sem taka þátt í deginum í ár eru Sólheimar, Gróðurhúsið Sunna, Verslunin Vala, Mötuneytið Vigdísarhús, Vinnumálastofnun Suðurlandi, Dagskráin, Vinnueftirlitið, Gullfosskaffi, Kotið hjá Sveitarfélaginu Árborg og Skinney Þinganes í Þorlákshöfn.