Lögreglan á Selfossi upprætti kannabisræktun í yfirgefnu íbúðarhúsi í Ölfusinu í gærkvöldi. Lögreglan lagði hald á 75 plöntur sem voru á öllum stigum ræktunar.
Það voru árvökulir lögreglumenn sem komust á snoðir um ræktunina. Þegar lögreglumenn komu að húsinu fannst greinilega að kannabislykt lagði frá opnum glugga á húsinu. Fíkniefnahundurinn Buster fór á staðinn og staðfesti grun lögreglumanna.
Enginn var í húsinu en skömmu síðar kom þar karlmaður á þrítugsaldri og viðurkenndi hann að vera með ræktun í húsinu. Hann var handtekinn og verður yfirheyrður í dag.
Hald var lagt á ræktunarbúnað, 16 fullvaxnar plöntur og 59 sprota.
Í framhaldi var gerð leit á heimili mannsins og þar fannst lítilræði af kannabisefnum. Maðurinn hefur gengist við ræktuninni og hafa einn staðið að henni. Plönturnar hafa verið sendar til frekari rannsóknar á rannsóknarstofu.