Húsfyllir var á fundi sem samtökin Til vinstri við ESB efndu til í Tryggvaskála á Selfossi í gær, sunnudaginn 15. mars. Fundarefni var staða landbúnaðar gagnvart fyrirhugaðri aðildarumsókn að ESB.
Frummælendur gagnrýndu ríkisstjórnina og ESB-sinna fyrir að fela aðildarumsókn með því að kalla aðlögunarferli að sambandinu samningaviðræður. Fram kom að sjálft Evrópusambandið varar við þessum misskilningi í sínu eigin kynningarefni þar sem því er algerlega hafnað að lönd geti samið sig frá meginlögum ESB.
Erna Bjarnadóttir hagfræðingur sem var fyrsti framsögumaður fundarins benti í þessu sambandi á að grunnreglur Evrópusambandsins hefðu lagagildi og sérhver varanleg undanþága sem ætti að halda gagnvart dómstólum yrði að taka upp í svokallaðan frumrétt sambandsins sem þýðir að öll aðildarlönd verða að samþykkja þá breytingu.
Líflegar umræður spunnust um málið eftir framsöguræður þar sem Trausti Hjálmarsson formaður Bændasamtakanna og Lilja Alfreðsdóttir nýkjörinn formaður Framsóknarflokksins voru meðal þátttakenda. Framsögumenn voru auk Ernu sem fyrr er nefnd nafnarnir Þorsteinn Ólafsson dýralæknir og Þorsteinn Bergsson rithöfundur og fyrrverandi bóndi en hann er jafnframt formaður samtakanna Til vinstri við ESB. Ögmundur Jónasson fyrrverandi ráðherra var fundarstjóri.
Eftir formleg fundarslit var skotið á öðrum fundi í Skálanum þar sem stofnuð var Suðurlandsdeild samtakanna Til vinstri við ESB.