Lið Fjölbrautaskóla Suðurlands er úr leik í Gettu betur, spurningakeppni framhaldsskólanna, eftir að hafa velgt firnasterku liði Menntaskólans í Reykjavík undir uggum í undanúrslitunum í Ríkissjónvarpinu í kvöld.
MR leiddi allan tímann, staðan var 18-13 eftir hraðaspurningarnar en á lokasprettinum svaraði FSu 5 stiga spurningu og átti enn möguleika á sigri fyrir tvær síðustu spurningarnar. EmmErr-ingar áttu hins vegar lokaorðið í kvöld og tryggðu sér 36-25 sigur.
Lið FSu skipa þau Valgeir Gestur Eysteinsson, Hrafnhildur Svava Hemmert Sigurðardóttir og Hjálmar Vilhelm Rúnarsson.
Í næstu viku mætast Verslunarskóli Íslands og Menntaskólinn á Egilsstöðum og eftir þá viðureign kemur í ljós hvor skólinn mætir MR í úrslitaviðureigninni í Háskólabíói 11. apríl.