Lið Fjölbrautaskóla Suðurlands sigraði lið Fjölbrautaskóla Vesturlands Akranesi í 8-liða úrslitum Gettu betur, spurningakeppni framhaldsskólanna, í beinni útsendingu í Ríkissjónvarpinu í kvöld.
FSu hafði forystuna frá upphafi en um miðbik keppninnar var mjótt á mununum og spennan mikil. Þau sunnlensku voru hins vegar sterkari á endasprettinum og unnu öruggan sigur, 27-14.
Lið FSu skipa þau Valgeir Gestur Eysteinsson, Hrafnhildur Svava Hemmert Sigurðardóttir og Hjálmar Vilhelm Rúnarsson.
Að keppni lokinni var dregið í undanúrslitin og þar mætir Fjölbrautaskóli Suðurlands Menntaskólanum í Reykjavík næstkomandi fimmtudag. Í hinni viðureigninni mætir Verslunarskóli Íslands Menntaskólanum á Egilsstöðum.