Lið Fjölbrautaskóla Suðurlands er komið áfram í 16-liða úrslit spurningakeppni framhaldsskólanna, Gettu betur, eftir öruggan sigur á Borgarholtsskóla í fyrstu umferðinni í kvöld.
FSu tók forystuna strax eftir hraðaspurningarnar og sigraði að lokum 26-8. Lið FSu skipa þau Elín Karlsdóttir, Ásrún Aldís Hreinsdóttir og Heimir Árni Erlendsson í Landeyjum.
Menntaskólinn að Laugarvatni mætti sterku liði Tækniskólans í lokaviðureign 1. umferðarinnar. ML-ingar börðust með kjafti og klóm framan af, en Tækniskólinn var sterkari á lokasprettinum og sigraði 32-16. Lið ML skipa þau Teitur Snær Vignisson, Þorbjörg Guðrún Kristófersdóttir og Magnús Skúli Kjartansson.
Í kvöld var dregið í 16-liða úrslitin og þar mun FSu mæta Menntaskólanum við Hamrahlíð næstkomandi miðvikudagskvöld.
