Lið Fjölbrautaskóla Suðurlands og Menntaskólans að Laugarvatni tóku þá í úrslitakeppni Boxins, framkvæmdakeppni framhaldsskólanna um helgina. Lið FSu varð í 3. sæti í keppninni.
Alls tóku 26 lið frá fjórtán skólum þátt í forkeppni í október en átta skólar komust í úrslitakeppnina sem fór að venju fram í húsakynnum Háskólans í Reykjavík. Lið FSu stóð sig með mikum ágætum og uppskar fyrir vikið þriðja sæti. Liðið skipuðu Leó Snær Róbertsson, Dagur Snær Elísson, Karólína Ívarsdóttir, Álfheiður Österby og Harpa Svansdóttir. Umsjón með liði FSu hafði Ágústa Ragnarsdóttir kennari.
Lið Menntaskólans að Laugarvatni skipuðu Anna Marý Karlsdóttir, Einar Trausti Svansson, Håkon Snær Snorrason, Rúnar Guðjónsson og Sóldögg Rán Davíðsdóttir. Í lokakeppninni í HR var kallaður til varamaðurinn Ástráður Unnar Sigurðsson.
Í úrslitakeppninni var það lið Menntaskólans við Hamrahlíð sem bar sigur úr bítum og lið Menntaskólans í Reykjavík hlaut annað sæti. Annað árið í röð voru einu landsbyggðarskólarnir í úrslitakeppninni, lið FSu og ML.
Háskólinn í Reykjavík, Samtök iðnaðarins, mennta- og menningarmálaráðuneyti og Samband íslenskra framhaldsskólanema standa að Boxinu sem nú var haldið í sjöunda sinn. Boxið er vettvangur fyrir framhaldsskólanema til að spreyta sig á ólíkum verkefnum, reyna á samvinnu og kynnast tækni og iðnaði á fjölbreyttan og skemmilegan hátt. Keppnin er frábær vettvangur fyrir ungt fólk sem er óhrætt við að hugsa út fyrir boxið og reyna á hugvit sitt og verklag í góðum hópi.
Úrslitakeppnin er þrautabraut með átta stöðvum og fara liðin á milli og leysa eina þraut, oft margþætta, á hverjum stað. Átta fyrirtæki úr Samtökum iðnaðarins útbúa þrautirnar ásamt kennurum frá HR. Fyrirtækin sem lögðu þrautirnar fyrir í ár voru: Endurvinnslan, KeyNatura, Valka, Marel, Mannvit, Oddi, NoxMedical og Kóðinn/Skema.
Lið FSu hreppti ekki einungis þriðja sæti og góðar gjafir sem því fylgdu heldur hlaut það einnig tvenn auka verðlaun. Annars vegar frá Endurvinnslunni fyrir glæsilega lausn og góða nýtingu á tíma við að búa til bíl úr áldósum og hins vegar frá KeyNatura fyrir góða liðsheild, yfirvegun og útsjónarsemi við aðstæður sem þau höfðu ekki reynt áður.
Að venju tók RÚV upp keppnina og viðtöl við keppendur og verða gerðir tíu stuttir þættir sem sýndir verða eftir áramót.
Lið Menntaskólans að Laugarvatni.