Framrás í Vík átti lægra tilboðið í hrunvarnir á þjóðvegi 1 við Holtsnúp undir Eyjafjöllum. Tilboð Framrásar var aðeins 38% af áætluðum verktakakostnaði Vegagerðarinnar.
Framrás bauð 20,6 milljónir króna í verkið en Snilldarverk ehf á Hellu bauð 46,4 milljónir. Áætlaður verktakakostnaður Vegagerðarinnar er 54,2 milljónir króna.
Skera á inn í hlíðina á um 360 m kafla og efnið verður notað í lagfæringu á vegfláa á um kílómeters kafla af veginum. Hrunvarnir úr svokölluðum gabion grindum verða reistar á um 300 m kafla.
Verkinu á að vera lokið þann 15. ágúst næstkomandi.