Framrás ehf í Vík átti lægra tilboðið í vegagerð að gestastofu Vatnajökulsþjóðgarðs á Kirkjubæjarklaustri.
Tilboð Framrásar hljóðaði upp á 45,8 milljónir króna og var mjög nálægt áætluðum verktakakostnaði Vegagerðarinnar sem var 46,1 milljón króna.
Vörubifreiðastjórafélagið Mjölnir á Selfossi bauð einnig í verkið, tæpar 53,2 milljónir króna.
Um er að ræða 500 metra langan veg að fyrirhugaðri gestastofu Vatnajökulsþjóðgarðs á Kirkjubæjarklaustri, auk jarðvegsskipta fyrir bílaplan og afvötnun þess.
Verkinu á að vera lokið þann 15. ágúst næstkomandi.