Frammistaðan til fyrirmyndar

„Frammistaða björgunarfólks var algerlega til fyrirmyndar og öllum þeim sem komu að aðgerðinni til mikils sóma,“ segir Sveinn Kristján Rúnarsson, yfirlögregluþjónn á Hvolsvelli.

Hann vill fyrir hönd lögreglunnar á Hvolsvelli og svæðisstjórnar björgunarsveitanna á svæði 16 koma kærum þökkum til allra sem komu að erfiðri björgunaraðgerð á Eyjafjallajökli í gærkvöldi og í nótt.

„Þarna voru hátt í 200 manns frá suðurlandi og höfuðborgarsvæðinu við björgunaraðgerðir við mjög erfiðar aðstæður,“ segir Sveinn Kristján ennfremur.

Þýski fjallagarpurinn kom á Hellu um kl. 11 í morgun til læknisskoðunar. Hann var aðeins kalinn á fingrum eftir vistina á jöklinum og þarf ekki að vera undir nánara eftirliti læknis.

För björgunarsveita til byggða tafðist nokkuð í morgun, en tvö drifsköft brotnuðu undan bílum og auk þess skemmdust sex dekk.