Framkvæmdir hafnar í Laugarvatnsskógi

Framkvæmdir eru nú hafnar á lóð nýs áningarstaðar og þjónustuhúss í Laugarvatnsskógi. Skógur hefur verið ruddur af byggingarstaðnum og jarðvinna verið boðin út.

Stefnt er að því að reisa burðarvirki hússins næsta vor og að þessi nýi áningarstaður verði tilbúinn um haustið. Frá þessu er greint á heimasíðu Skógræktarinnar.

Húsið verður eingöngu smíðað úr íslenskum viði og hæstu trén sem felld hafa verið til að afla viðar í burðarvirkið voru 22 metra há. Húsið er byggt á verðlaunatillögu úr samkeppni um þjónustuhús fyrir þjóðskóga landsins sem haldin var 2013. Áætlað er að það kosti um 30 milljónir króna. Tíu milljónir króna voru veittar til verkefnisins á þessu ári úr Framkvæmdasjóði ferðamannastaða.

Trjábolir í burðarviðina voru felldir fyrir nokkru í Haukadal en í klæðningu hússins verður notað sitkagreni úr Þjórsárdal og þess efnis hefur þegar verið aflað einnig og viðurinn unninn í klæðninguna í nýju sögunarmyllunni þar.

Nýlega var skógur ruddur á byggingarstaðnum í Laugarvatnsskógi og jarðvinna hófst á mánudag. Suðurtak á Brjánsstöðum í Grímnesi fékk verkið að afloknu útboði.

Um lokahönnun hússins sáu Arkís arkitektar og Verkfræðistofa Þráinn og Benedikt ehf. en aðalarkitekt er Birgir Teitsson. Ívar Örn Þrastarson er byggingarstjóri.

Laugarvatnsskógur er í brekkunni fyrir ofan Laugarvatnsþorpið og teygir sig til vesturs fyrir ofan veginn um Lyngdalsheiði og til austurs inn fyrir tjaldsvæðið á Laugarvatni að landamerkjum Snorrastaða.