Framboðslisti Miðflokksins í Árborg hefur verið úrskurðaður ólögmætur og mun því flokkurinn ekki geta boðið fram í sveitarfélaginu.
Í samtali við mbl.is segir Karl Gauti Hjaltason yfirkjörstjórn Árborgar hafa úrskurðað á föstudag að listi flokksins í sveitarfélaginu hefði verið of seint fram kominn.
Sú ákvörðun hafi verið kærð til úrskurðarnefndar kosningamála sem staðfesti í dag úrskurð kjörstjórnarinnar.
Munaði 22 mínútum
Segir Karl Gauti að listanum hafi verið skilað 22 mínútum of seint en framboðsfrestur rann út klukkan 12 að hádegi á föstudag. Bætir Karl Gauti við að öll gögn hafi þá verið undirrituð og löglega framfærð. Hins vegar hafi svo ekki verið neinn fulltrúi flokksins á staðnum til að staðfesta listann.
„Þarna er svo mikill formalisti á ferðinni að þeir geta ekki horft fram hjá því að einhver maður mæti þarna og kalli að Miðflokkurinn ætli að bjóða fram og fengi þá frest sem allir aðrir fá í sólarhring til að laga gögn – sem við þurftum í raun og veru ekki vegna þess að öll okkar gögn voru komin í lag,“ segir Karl Gauti.