Vettvangshjálparhópur Björgunarfélagsins Eyvindar á Flúðum var kallaður út í dag til þess að aðstoða mann sem slasaðist við Geysi í Haukadal.
Maðurinn hafði hrasað illa í hálku og fótbrotnað. Í tilkynningu frá Landsbjörgu kemur fram að maðurinn hafi verið nokkuð kvalinn en björgunarsveitarfólkið bjó um hann og flutti hann til móts við sjúkrabíl sem ók með manninn á slysadeild í Reykjavík.