Björgunarsveitir voru kallaðar út um hádegi í dag til að sækja konu sem fótbrotnað hafði í Reykjadal ofan við Hveragerði.
Sveitir frá Hveragerði, Þorlákshöfn, Eyrarbakka og Árborg fóru á staðinn, alls 25 manns.
Konan var staðsett nokkuð fyrir ofan heita lækinn í dalnum og því var sent lið bæði ofan af heiðinni og upp Rjúpnabrekkur neðst í dalnum.
Hún var flutt í sjúkrabíl sem ók henni á slysadeild.