Forseti Íslands, Guðni Th. Jóhannesson, og Eliza Reid, forsetafrú, koma í opinbera heimsókn í Bláskógabyggð á morgun, föstudaginn 9. júní.
Heimsókn forsetahjónanna er í tilefni af 15 ára afmælis Bláskógabyggðar. Forsetahjónin munu fara vítt og breitt um sveitarfélagið, þau munu m.a. koma við á Þingvöllum, Laugarvatni, Laugarási og Reykholti. Þá munu þau heimsækja Laugarvatnshella og kúabú.
Á þessum tímamótum mun Bláskógabyggð skrifa undir samning um Heilsueflandi samfélag við Embætti landlæknis. Óttarr Proppé, heilbrigðisráðherra, mun mæta í Heilsugæsluna í Laugarási þar sem undirritunin fer fram og ávarpa samkomuna.
Heimsókn forsetahjónanna mun ljúka í félagsheimilinu Aratungu en þar verður opið hús fyrir íbúa og gesti frá kl. 16:00-18:00.