Alþjóðlegur minningardagur um fórnarlömb umferðarslysa er haldinn á morgun, sunnudaginn 15. nóvember. Á Kirkjubæjarklaustri verður bænastund í Minningarkapellu sr. Jóns Steingrímssonar í tilefni dagsins.
Séra Ingimar Helgason leiðir stundina, sem hefst klukkan 11, og mun Kirkjukór Prestsbakkakirkju syngja falleg lög undir stjórn og undirleiks Svavars Sigurðssonar. Fjölmargir viðbragðsaðilar verða með bílana sína á staðnum.
Minningardagurinn er haldinn að frumkvæði Sameinuðu þjóðanna til þess að minnast þeirra sem látist hafa í umferðinni, leiða hugann að ábyrgð hvers og eins í umferðinni en ekki hvað síst að þakka þeim viðbragðsaðilum sem veita hjálp og björgun. Að þessu sinni er sérstök áhersla lögð á unga vegfarendur.
Í Reykjavík verður haldin minningarathöfn kl. 14:00 við þyrlupallinn við Landspítalann í Fossvogi. Beint streymi verður frá athöfninni í Reykjavík og má nálgast streymið hér.