Fórnarlamba umferðarslysa minnst á nýja Suðurlandsveginum

Viðbragðsaðilar kveiktu á kertum til að minnast þeirra sem látist hafa í umferðinni. sunnlenska.is/Guðmundur Karl

Í dag, 15. nóvember, er árleg­ur alþjóðleg­ur minn­ing­ar­dag­ur um fórn­ar­lömb um­ferðarslysa. Minningarstund var í kvöld á nýja Suðurlandsveginum undir Ingólfsfjalli.

Viðbragðsaðilar í Árnessýslu mættu til minningarstundarinnar, kveikt var á kertum, Sigurður Ingi Jóhannsson samgönguráðherra flutti ávarp og síðan var mínútu þögn undir bláum ljósum til þess að minnast þeirra sem látist hafa í umferðarslysum.

„Hér á bakvið mig stendur hópur öflugs fólks sem vinnur sem ein liðsheild, hvaðan sem þau koma, og við í samfélaginu stöndum í mikilli þakkarskuld við allt þetta fólk og heilbrigðisstarfsmenn að auki sem ekki eru hér í dag. Við, sem erum allt of mörg, sem þekkjum það að hafa misst ástvini þökkum þeim af hlýhug, minnumst ástvina okkar og hugsum líka fallega til þeirra sem sannarlega leggja sjálfa sig að húfi í að bjarga okkur hinum. Kærar þakkir,“ sagði Sigurður Ingi í ávarpi sínu.

Frá því að fyrsta bana­slysið var skráð hér á landi 25. ág­úst 1915 hafa 1.585 manns lát­ist í um­ferðinni á Íslandi. Enn fleiri slasast al­var­lega, tak­ast á við áföll, sorg­ir og eft­ir­sjá af þess­um völd­um.

Að baki und­ir­bún­ingi dags­ins hér á landi standa Lands­björg, Sam­göngu­stofa og sam­göngu- og sveit­ar­stjórn­ar­ráðuneyti auk fjölda sjálf­boðaliða.

Mínútu þögn undir bláum ljósum. sunnlenska.is/Guðmundur Karl
Sigurður Ingi Jóhannsson, samgönguráðherra, flutti ávarp. sunnlenska.is/Guðmundur Karl
Kveikt var á kertum til að minnast látinna í umferðinni. sunnlenska.is/Guðmundur Karl

Hér fyrir neðan er drónamyndband frá minningarstundinni frá Björgunarsveitinni Björg á Eyrarbakka.

Ein­kenn­islag dags­ins er lag KK, When I Think of Ang­els, í flutn­ingi hans og Ell­en­ar Kristjáns­dótt­ur sem samið var til minn­ing­ar um syst­ur þeirra sem lést í um­ferðarslysi í Banda­ríkj­un­um árið 1992.