Klukkan hálf sex í dag voru björgunarsveitir á Suðurlandi boðaðar út vegna karls og konu sem höfðu lent í sjálfheldu í Reynisfjöru. Hafði fólkið gengið meðfram klettum á fjöru en ekki gætt að sér þegar fór að flæða að.
Björgunarsveitin Víkverji í Vík var kölluð fyrst út en skömmu síðar var viðbragðið aukið og björgunarsveitir frá Árborgarsvæðinu að Kirkjubæjarklaustri boðaðar út, auk björgunarskipsins Þórs í Vestmannaeyjum.
Fólkið var staðsett með dróna og skömmu síðar var Þór kominn að Reynisfjöru ásamt léttum gúmmíbát sem Víkverji kom á frá Vík. Hægt var að lenda gúmmíbátnum í fjörunni skammt frá fólkinu og það var svo flutt í Reynisfjöru, heilt á húfi.
