Um klukkan 12:30 í dag voru björgunarsveitir á Hvolsvelli og Hellu kallaðar út vegna vélsleðaslyss á Hamragarðaheiði. Skömmu síðar var óskað eftir þyrlu frá Landhelgisgæslu.
Þarna var á ferðinni hópur fólks og einn ferðalanganna velti sleða sínum og virðist hafa orðið undir honum. Óttast var að viðkomandi væri fótbrotinn.
Talsverður skafrenningur var á slysstað og var hinn slasaði fluttur með björgunarsveitarbíl neðar í heiðina þar sem þyrlan gat lent vandræðalaust.
Þyrla var lent á heiðinni rétt fyrir klukkan 14 og flutti hinn slasaða á slysadeild Landspítalans.