Matvælastofnun hefur óskað eftir lögreglurannsókn á meintum flutningi sauðfjár yfir Hvítá.
Óheimilt er að flytja sauðfé yfir varnarlínur nema í sérstökum undantekningartilfellum að fengnu leyfi stofnunarinnar.
Grunur leikur á að bændur úr Hrunamannahreppi hafi sótt nokkra tugi lamba í þeirra eigu sem komu í réttir í Biskupstungum í september síðastliðnum og flutt yfir varnarlínu.
Í tilkynningu frá Matvælastofnun segir að tilgangur dýrasjúkdómalaga sé m.a. að hindra útbreiðslu dýrasjúkdóma og vinna að útrýmingu þeirra. Samkvæmt þeim lögum ákveður ráðherra, að fengnum tillögum Matvælastofnunar, hvaða varnarlínum skuli haldið við. Varnarlínur eru ákveðnar til að verja eftir föngum bústofn bænda fyrir dýrasjúkdómum.