Flutningabíll valt á hliðina á Þorlákshafnarvegi, á Hraunsheiði norðan við Þorlákshöfn, á áttunda tímanum í kvöld. Mikið hreinsunarstarf er framundan á vettvangi en bíllinn var fulllestaður af fiskafurðum.
Bílstjórinn var einn í bílnum og komst hann af sjálfsdáðum út úr bílnum. Hann var fluttur með sjúkrabíl á slysadeild Heilbrigðisstofnunar Suðurlands en ekki er vitað um líðan hans.
Þorlákshafnarvegur er lokaður vegna slyssins og verður fram á nótt á meðan á hreinsunarstarfi stendur en farmurinn fór út um allan veg og einnig lak olía úr bílnum.
