Flugvél Landhelgisgæslunnar, TF-SIF, var að koma úr eftirlitsflugi á Norðurlandi í gærkvöldi þegar upplýsingar bárust um að leit væri að hefjast norður af Heklu vegna ferðamanna í jeppabifreið sem væru í vanda.
Ákveðið var að flugvélinni yrði flogið yfir svæðið til að koma auga á bílinn og eftir stutta leit fann áhöfnin flugvélarinnar jeppann. Flugmennirnir blikkuðu lendingarljósum vélarinnar í átt að fólkinu, sem gat blikkað til baka með ljósum bílsins.
Stjórnstöð Landhelgisgæslunnar sendi Landsbjörgu nákvæma staðsetningu bílsins í kjölfarið en björgunarsveitir úr Rangárvallasýslu höfðu verið kallaðar út til leitar og komu þær fólkinu til aðstoðar í kjölfarið.