Flugeldar fældu hrossastóðið

Hrossið sem ekið var á á Laugarvatnsvegi við Brúará í morgun hefur verið aflífað. Stóðið sem hrossið var í fældist vegna flugeldaskotríðar.

Hrossið varð fyrir pallbifreið og slasaðist það mikið að ekki var hjá því komist að aflífa það. Hrossastóð var á og við veginn og er talið að það fælst vegna notkunar skotelda í sumarhúsabyggð við Syðri-Reyki fyrr um nóttina eða kvöldið. Stóðið ruddist í gegnum girðingu við veginn.

Lögreglan á Selfossi biður þá sem kannast við eða geta veitt upplýsingar um skoteldanotkun á umræddu svæði í gærkvöldi eða í nótt að hafa samband í síma lögreglu 480 1010.

Um leið vill lögreglan koma því á framfæri við almenning að fylgja eftir lögum og reglum um skotelda og taka sérstakt tillit til dýra. Þess skal getið að notkun skotelda er bönnuð við gripahús og meðferð þeirra er alltaf bönnuð frá miðnætti til kl. 09:00 að undanskilinni nýársnótt.