„Flúðir um versló“ í fjórða sinn

Fjölskyldu- og bæjarhátíðin „Flúðir um versló“ verður haldin á Flúðum í Hrunamannahreppi um verslunarmannahelgina. Þetta er í fjórða skiptið sem hátíðin er haldin og verður dagskráin stórglæsileg og metnaðarfull.

Hátíðin er orðin fastur liður í hátíðarhaldi þessa miklu gleðihelgi og undanfarin ár hafa gestir verið á milli 10.000 til 14.000. Í ár verður haldið í hefðir fyrri ára með nokkrum viðbótum.

Flúðir taka vel á móti öllum gestum og er aðstaða á tjaldsvæðinu til fyrirmyndar, enda er um eitt af stærri tjaldsvæðum landsins að ræða. Þar að auki hefur verið svæðið verið stækkað frá því í fyrra og rafmagnstenglum á svæðinu einnig verið fjölgað. Nánari upplýsingar um tjaldvæðið má finna hér.

Þetta árið verður ekki verður í boði sérstakt ungmenna tjaldsvæði. Aðal ástæðan fyrir þessari breytingu er sú að svæðið sem hefur verið notað sem unglingasvæði undanfarin ár hefur verið skipulagt til framkvæmda og verða framkvæmdir væntanlega hafnar um verslunarmannahelgina. Eingöngu verður í boði að vera á aðal-tjaldsvæðinu og þar er og mun vera 23 ára aldurstakmark. Hátíðarhaldarar leggja til að ungmenni yngri en 23 ára komi í fylgd fjölskyldna sinna og allir njóti saman.

Öflugt eftirlit verður á Flúðum frá upphafi vikunnar í aðdraganda helgarinnar til að koma í veg fyrir að gestir tjaldi eða komi sér fyrir þar sem það er óheimilit. Þetta gæti komið við einhverja en bent er á tjaldsvæði í nágrenni Flúða og að gestir geri ráðstafanir varðandi þessa breytingu.

Eftirlit verður á svæðinu verður í höndum Björgunarfélagsins Eyvinds, lögreglu, gæsluaðila, sjálfboðaliða og fleiri aðila frá mánaðarmótum júlí/ágúst og fram yfir helgi. Hart verður tekið á ofbeldismálum, fíkniefnamálum og öðru sem hátíðarhaldarar vilja ekki sjá á svona glæsilegri hátíð.

Allar upplýsingar fást á Facebook ,,Flúðir um Versló” en efnimun einnig verða birt á Snapchat reikningnum ,,fludirumverslo”

Hátíðin er haldin af Sonus viðburðum ehf. í góðu samstarfi við Hrunamannahrepp, Tjaldmiðstöðina á Flúðum, Ölgerðina Egill Skallagrímsson og fjölda fyrirtækja og einkaaðila.