Flóttafólk boðið velkomið – börnin fá að æfa íþróttir frítt

Aðalstjórnir Ungmennafélags Selfoss og Íþróttafélagsins Hamars í Hveragerði hafa ákveðið að bjóða börnum og unglingum í hópi flóttafjölskyldnanna sem fluttu í bæina í vikunni að æfa endurgjaldslaust hjá félögunum árið 2017.

Þrjár fjölskyldur munu flytja í Hveragerði og á Selfoss og eru tvær þeirra komnar til landsins. Fimmtán börn og unglingar eru í hópnum.

Með þessu vonast íþróttafélögin til þess að framtakið hjálpi ungmennunum að aðlagast nýjum aðstæðum og nái sterkri fótfestu í samfélaginu. Rannsóknir hafa sýnt fram á að íþróttaiðkun er talin jákvæð leið fyrir ungmenni til að efla andlega vellíðan sína og mynda ný vináttutengsl og er ekki síst mikilvæg fyrir börn innflytjenda.