Flóahreppur íhugar skaðabótamál

Sveitarstjóri Flóahrepps segir að hreppurinn muni kanna að höfða skaðabótamál á hendur umhverfisráðherra vegna þess tjóns töf á aðalskipulagi hefur valdið.

Margrét Sigurðardóttir sveitarstjóri segir dóm Hæstaréttar í gær sýna að ráðherra geti ekki tekið geðþóttaákvarðanir heldur verði að byggja á faglegum sjónarmiðum.

“Þetta var pólitísk ákvörðun sem var tekin hreinlega vegna þess að ráðherra var á móti virkjun,” segir Margrét. “En eins og við höfum svo margoft bent á þá er Flóahreppur ekki að fara að virkja. Þetta snerist fyrst og fremst um skipulagsmál og það að sveitarfélög megi hafa sitt skipulagsvald í friði,” sagði sveitarstjórinn í fréttum Bylgjunnar.

Flóahreppur samþykkti aðalskipulagið í desember árið 2008 og hefur nú í meira en tvö ár beðið staðfestingar ráðherra. Á meðan hafa framkvæmdir legið í láginni. Sveitarstjórinn segir að án aðalskipulags sé ekkert hægt að gera.

“Það er ekki hægt að deiliskipuleggja. Það er ekki hægt að byggja við hús. Byggja útihús. Það er í raun ekkert hægt að gera. Þetta bindur hendur fólks og það dregur úr vilja fólks til að gera eitthvað,” og segir Margrét að svona hafi ástandið verið í hreppnum í tvö ár.

Hún segir að nú verði skoðað hvort Flóahreppur fari fram á skaðabætur frá ráðherra.

“Það er búið að skapa okkur tjón. Þetta er búið að taka langan tíma. Þetta er búið að kosta peninga, bæði fyrir sveitarfélagið og fyrir ríkið. Og þessum peningum og þessum tíma var illa varið, að mínu mati, ” segir Margrét.