Torkennilegt ljós sást á himni yfir Suðurlandi laust fyrir klukkan tíu í kvöld.
RÚV greindi fyrst frá þessu og birtir myndband af þessum fljúgandi furðuhlut sem tekið er í Þorlákshöfn.
Veðurstofan hefur fengið tilkynningar um ljósagang á himnum yfir Vestmannaeyjum og samkvæmt lýsingu er þar um sama hlutinn að ræða.
Samkvæmt heimildum sunnlenska.is sást ljósið einnig yfir höfuðborgarsvæðinu en myndina sem fylgir fréttinni tók Mýrdælingurinn Haraldur Björnsson í Árbænum. Hann fylgdist með ljósinu í góðar fimm mínútur áður en það hvarf upp í himingeiminn.
Sjónarvottar sem hafa haft samband við sunnlenska.is segja að ljósið hafi liðið rólega og algjörlega hljóðlaust eftir himninum.
UPPFÆRT KL. 23:55 Samkvæmt Aftonbladet sást ljósið víða í Svíþjóð og telur geimvísindamaðurinn Eric Stempels að þarna sé á ferðinni geimflaugin Atlas V sem skotið var á loft frá Vandenberg geimherstöðinni í Kaliforníu í Bandaríkjunum í kvöld en flauginni er ætlað að koma gervitunglinu Landsat 9 á braut um jörðu.