„Flæma garðyrkjunámið burt á kostnað verkefna háskólans“

Garðyrkjuskólinn að Reykjum í Ölfusi. Ljósmynd/LbhÍ

Hagsmunaaðilar í garðyrkju hafa ákveðið að birta sérálit sem skilað var til Mennta- og menningarmálaráðherra vegna þeirrar alvarlegu stöðu sem uppi er, og hefur verið, varðandi starfsmenntanám í garðyrkju.

Greinargerðinni er ætlað að varpa ljósi á þann vanda sem uppi er þar sem hagsmunir atvinnugreinarinnar og starfsmenntanámsins eru fyrir borð bornir.

Í tilkynningu frá hagsmunaaðilum í garðyrkju segir að það sé mikið fagnaðarefni að mennta- og menningarmálaráðherra skuli hafa ákveðið að færa starfsmenntanám í garðyrkjugreinum, sem er á framhaldsskólastigi, frá Landbúnaðarháskóla Íslands. Það sé hins vegar sérstakt áhyggjuefni að LbhÍ skuli ætla að leggja undir sig þá einu aðstöðu í landinu sem ætluð er og hefur verið fyrir starfsmenntanám í garðyrkju og nýta til óskyldra verkefna.

„Í rúmlega 80 ár hafa Reykir í Ölfusi verið hjarta garðyrkjunnar, en með tilburðum stjórnenda LbhÍ er nú verið að flæma garðyrkjunámið burt á kostnað verkefna háskólans, lítt tengdum garðyrkju, en skólinn hefur þegar starfsaðstöðu á Keldnaholti og Hvanneyri. Ef svo heldur sem horfir mun starfsmenntanám í garðyrkju að Reykjum í Ölfusi heyra sögunni til,“ segir í tilkynningu hagsmunaaðilanna sem munu áfram leita leiða til að standa vörð um starfsmenntanám í garðyrkju og mikilvægt og vandað rannsókna- og þróunarsamstarf því samhliða.

„Nauðsynlegt er að starfsmenntanáminu verði tryggð sú aðstaða sem til þess þarf, án frekari afskipta stjórnenda LbhÍ,“ segir ennfremur í tilkynningunni.

Undir hana rita Berglind Ásgeirsdóttir, formaður Sambands garðyrkju- og umhverfisstjóra sveitarfélaga, Gunnar Þorgeirsson, formaður Sambands garðyrkjubænda, Heiðar Smári Harðarson, formaður Félags skrúðgarðyrkjumeistara, Heimir Janusarson, Félagi iðn- og tæknigreina, Vernharður Gunnarsson, formaður Félags garðplöntuframleiðenda og Björn Bjarndal, formaður Félags skógareigenda á Suðurland.

Greinargerðina sem skilað var inn til Mennta- og menningamálaráðuneytisins má finna hér.