Um klukkan 17 í gær hóf lögreglan á Suðurlandi eftirgrennslan eftir rúmlega tvítugum karlmanni að beiðni aðstandenda hans í Árnessýslu. Björgunarsveitir voru kallaðar út til aðstoðar við leit á áttunda tímanum í gærkvöldi og um klukkan 22 fundu björgunarsveitarmenn bifreið mannsins yfirgefna niður undir sjó í Þykkvabæjarfjöru.
Leitað var með drónum, gangandi og með sporhundum nokkuð stórt svæði í kring um bílinn og svæðið milli Þjórsár og Hólsár inn í landið og fjöruleit beggja vegna við það svæði. Þá aðstoðaði þyrla Landhelgisgæslu við leitina en varð frá að hverfa vegna bilunar áður en leit lauk en henni var hætt um kl. 2:00 í nótt.
Leit hófst á ný í birtingu í morgun og stefnt er að því að leita fjörur frá Þorlákshöfn austur eftir Suðurströndinni að minnsta kosti að ósum Markafljóts en einnig verður svæðið milli Þjórsár og Hólsár upp að bæjum í Þykkvabæ leitað sérstaklega.
Í tilkynningu frá lögreglunni á Suðurlandi segir að aðstæður til leitar séu að því leiti góðar að jörð er frosin þannig að vart markar í eftir tæki leitarmanna og því hægt að sinna leitinni á fjórhjólum, bílum eða buggy bílum. Þá hafa stór svæði verið leituð og verða í dag með drónum björgunarsveitanna.