Fjórir með réttarstöðu sakbornings

Fjórir fangaverðir hafa réttarstöðu sakbornings vegna atviks á Litla Hrauni í byrjun árs og er til rannsóknar hjá lögreglunni á Selfossi.

Þetta staðfestir Oddur Árnason, yfirlögregluþjónn, í samtali við fréttastofu RÚV. Fangelsismálastofnun sjálf tilkynnti málið til lögreglu.

Oddur segir að einn þessara fangavarða hafi réttarstöðu sakbornings vegna framgöngu sinnar við fanga sem kveikt hafði í í fangaklefa sínum. Hinir þrír vegna rannsóknar lögreglu á því hvort þeir hafi brotið gegn starfsskyldum sínum með því að tilkynna ekki um málið til yfirmanna sinna.

Páll Winkel, fangelsismálastjóri, staðfestir í samtali við fréttastofu að upp hafi komið mál í fangelsinu sem hafi verið þess eðlis að fangelsismálastofnun hafi talið rétt að tilkynna það til lögreglu. Hann vill að öðru leyti ekki tjá sig um málið.

Frétt RÚV