Fjölheimar, nýtt mennta-, fræða- og upplýsingasetur, var formlega opnað í dag í gamla barnaskólanum á Selfossi.
Sveitarfélagið Árborg hefur endurinnréttað meginhluta hússins, sem síðast hýsti grunnskóla, fyrir starfsemi Háskólafélags Suðurlands, Fræðslunets Suðurlands, Markaðsstofu Suðurlands og minjavarðar Suðurlands. Sveitarfélagið afhenti leigutökum umráð húsnæðisins formlega í dag.
Efnt var til nafnasamkeppni vegna vígslu hússins en það var Ingunn Jónsdóttir sem stakk upp á Fjölheimum og fékk hún 50.000 króna verðlaun.
Fjöldi fólks var við vígsluna þar sem flutt voru ávörp og tónlistaratriði.