Síðastliðinn föstudag kom Bergþóra Kvaran frá Svaninum færandi hendi og afhenti JÁVERK staðfestingu á Svansvottun fyrir fjölbýlishúsin við Tryggvagötu 10-12 á Selfossi.
Guðjón Þórisson, verkefnastjóri auk Gylfa Gíslasonar, framkvæmdastjóra og Sigrúnar Melax, gæða-, öryggis-, og umhverisstjóra JÁVERK veittu vottuninni viðtöku.
Svansvottun felur í sér strangar kröfur um gæði, umhverfismál og innivist. Á byggingartíma eru framkvæmdar meðal annars rakamælingar og loftþéttleikaprófanir, auk þess sem öll byggingarefni þurfa að uppfylla kröfur Svansins um heilnæmi og umhverfisáhrif.
„Við hönnun og uppbyggingu íbúðanna á Tryggvagötu var sérstök áhersla lögð á góða innivist, hljóð- og ljósvist, loftræsingu, orkunýtingu og endingargóð efni. Notkun steypu með lægra kolefnisspori gerði okkur jafnframt kleift að draga úr kolefnislosun vegna steypunnar um ríflega 30%,“ segir Guðjón Þórisson í samtali við sunnlenska.is.
„Við erum afar stolt af þessu verkefni. Auk vandaðra íbúða hefur verið skapað fjölskylduvænt umhverfi þar sem grunnskóli, sundlaug, líkamsrækt, fjölbreytt þjónusta og nýji miðbær Selfoss er allt í göngufæri. Þarna er stæði í bílakjallara fyrir allar íbúðir, rúmgóðar geymslur og lyfta beint úr kjallara upp á allar hæðir.“
Þess má geta að fjölbýlishúsin við Tryggvagötu hlutu viðurkenningu sem fallegasta fjölbýlið í Árborg í sumar. Þar kom fram í umsögn dómnefndar að allur frágangur við húsin sé til mikils sóma og lóðin skemmtileg og vel hirt svo eftir er tekið.