Lögreglan á Suðurlandi hefur lokað fjallvegum í nágrenni Skaftár vegna yfirstandandi hlaups í ánni. Staðan er metin reglulega með sérfræðingum Veðurstofu Íslands og almannavörnum.
F-208 frá Landmannalaugum inn á Fjallabak nyrðra er lokaður ásamt Skaftártunguvegi frá Búlandi. Lokað er inn á Álftavatnskrókinn á vegi F-210 inná F-233 og vestan við vað yfir Hólmsá á gatnamótum F-210 og F-232.
Fólk haldi sig fjarri upptökunum
Brennisteinsvetnismengunar getur gætt þar sem hlaupvatn kemur undan jökli og getur skaðað slímhúð í öndunarfærum og augum auk þess sem árnar geta flætt yfir bakka og vegi sem liggja þeim nærri. Ferðafólki er því eindregið ráðlagt að halda sig fjarri farvegi Skaftár ofan Skaftárdals svo og jöðrum Skaftárjökuls, Tungnaárjökuls og Síðujökuls á meðan hlaupið stendur yfir.
SMS gætu borist út fyrir hættusvæðið
Send hafa verið út SMS boð til fólks á svæðinu við Skaftá þar sem varað er við hættunni og það beðið um að yfirgefa svæðið. Ekki er hægt að útiloka að SMS-skilaboðin berist til fólks aðeins utan við skilgreint svæði og er almenningur beðinn um að hafa það í huga.