First Water, sem sérhæfir sig í sjálfbæru landeldi, vinnslu og útflutningi á laxi frá Þorlákshöfn, hefur ráðið þrjá nýja starfsmenn í lykilstöður hjá fyrirtækinu.
Sigurður Óli Sigurðarson hefur verið ráðinn sérfræðingur á fjármálasviði, Vilborg Magnúsdóttir hefur verið ráðin öryggisstjóri og Sigmar Örn Sigþórsson hefur verið ráðinn tæknistjóri í vinnslu.
„Það er mikill styrkur fyrir First Water að fá svo öflugan hóp sérfræðinga til liðs við fyrirtækið,“ segir Eggert Þór Kristófersson forstjóri félagsins. „Við erum á miklu uppbyggingarskeiði, eldið gengur framar vonum og sölustarfsemin er komin á gott skrið og verkefnin hjá okkur eru afar fjölbreytt og krefjandi. Það er því mikilvægt að fá til starfa reynslumikið og öflugt fólk með fjölbreyttan bakgrunn.“
Sigurður Óli mun starfa á sviði viðskiptaþróunar og koma að áætlanagerð, fjárfestakynningum og öðrum fjármálatengdum verkefnum. Hann er með B.Sc.-gráðu í viðskiptum frá Coastal Carolina University og M.Sc.-gráðu í fjárfestingastjórnun frá Háskólanum í Reykjavík og starfaði áður hjá PwC á Íslandi og Landsbankanum.
Vilborg mun bera ábyrgð á öryggismálum, forvörnum og verkefnum tengdum uppbyggingu landeldisstöðvar fyrirtækisins í Þorlákshöfn. Vilborg er með meistaragráðu í sálfræði frá Háskóla Íslands með áherslu á atferlismiðað öryggi og atferlismiðaða stjórnun. Hún hefur einnig lokið námi við Lögregluskóla ríkisins. Vilborg hefur víðtæka reynslu. Hún starfaði áður sem öryggis- og gæðastjóri innanlandsflugvalla hjá Isavia, sem rannsóknarlögreglumaður og hjá Sjóvá og Kynnisferðum.
Sigmar Örn Sigþórsson mun hafa yfirumsjón með tæknibúnaði og verklegum þáttum framleiðslu- og vinnslukerfa. Sigmar er vélfræðingur frá Vélskóla Íslands og með skipstjórnarréttindi frá Stýrimannaskólanum í Reykjavík. Hann hefur einnig lokið APME-námi í verkefnastjórnun frá Háskólanum í Reykjavík. Hann starfaði um árabil hjá HS Orku sem vélfræðingur orkuvera og kerfisstjóri. Þá starfaði hann einnig hjá Landsvirkjun og Orku Náttúrunnar.