Töluvert var um umferðaróhöpp og slys í umdæmi Selfosslögregunnar í liðinni viku. Í fimmtán skipti var lögregla kölluð til vegna einhverskonar slysa.
Engin alvarleg slys hlutust af umferðaróhöppunum.
Kona lenti með fingur í hekkklippum og hlaut stóran skurð á fingurinn. Konan fór á slysavakt á heilsugæslunni á Selfossi þar sem nokkur spor voru saumuð í fingurinn.
Maður slasaðist á höfði og braut tönn þegar hann datt á andlitið á tjaldsvæðinu í Miðdal.
Maður slasaðist við vinnu sína í Hótel Selfossi er hann missti taki á hníf sem stakkst í gegnum skó hans og í fótinn. Gert var að sári hans á heilsugæslunni á Selfossi.
Tólf ára drengur féll úr efri koju á heimili sínu aðfaranótt sunnudags og hlaut höfuðáverka. Hann var fluttur með sjúkrabíl á Slysadeild Landspítala í Fossvogi til aðhlynningar.