Fimm gefa kost á sér í 1. sætið hjá VG

Frambjóðendur VG í Suðurkjördæmi.

Átta frambjóðendur gefa kost á sér í fimm efstu sætin í forvali Vinstri grænna í Suðurkjördæmi og þar af sækjast fimm eftir 1. sætinu.

Almar Sigurðsson, ferðaþjónustubóndi og formaður svæðisfélags Vg í Árnessýslu, Heiða Guðný Ásgeirsdóttir, bóndi og sveitarstjórnarmaður í Skaftárhreppi, Hólmfríður Árnadóttir, skólastjóri og formaður svæðisfélags Vg á Suðurnesjum, Kolbeinn Óttarsson Proppé, alþingismaður, Róbert Marshall, leiðsögumaður, bjóða sig fram í fyrsta sæti.

Að auki bjóða Sigrún Birna Steinarsdóttir, háskólanemi og formaður Ungra Vinstri grænna sig fram í 2.-3. sæti, Helga Tryggvadóttir náms- og starfsráðgjafi í 2.-5.  sæti og Anna Jóna Gunnarsdóttir, hjúkrunarfræðingur í 3.-5. sæti.

Forval VG í Suðurkjördæmi er rafrænt og hefst klukkan 00:01 þann 10. apríl og lýkur klukkan 17:00 þann 12. apríl. Úrslit verða kunngjörð sama dag.

Kjörstjórn mun halda þrjá formlega kynningarfundi með frambjóðendum á Zoom og verða tveir fyrstu fundirnir opnir öllum, en sá síðasti er fundur ætlaður félögum í VG sem eru kjósendur í forvalinu.

Fyrsti fundurinn verður haldinn 16. mars, annar fundurinn verður 25. mars og sá þriðju þann 8. apríl. Þann 31. mars verða síðustu forvöð að skrá sig í VG til að taka þátt í forvalinu.

Úrslit forvalsins eru bindandi, að öðru leyti en því, að tryggja skal að ekki halli á konur á listanum. Þá skal tryggt að ekki séu færri en tvö af hvoru kyni í fimm efstu sætum listans.

Í tilkynningu frá VG kemur fram að kjörstjórn Suðurkjördæmis stilli svo upp 20 manna framboðslista að teknu tilliti til aldursdreifingar, kyns, búsetu, uppruna, starfs og svo framvegis, þannig að listinn endurspegli samfélagið sem best.  Framboðslisti VG í Suðurkjördæmi verður lagður fram til samþykktar á kjördæmisþingi í maí.