Fimm ára afmælishátíð Fischerseturs

Laugardaginn 21. júlí næstkomandi verður þess minnst að fimm ár eru liðin frá því að Fischersetrið á Selfossi var stofnað.

Afmælishátíðin hefst í Laugardælakirkju kl. 15:30. Þar mun séra Kristinn Ágúst Friðfinnsson, fyrrverandi sóknarprestur Selfossprestakalls, sjá um minningarathöfn og Davíð Oddsson fyrrverandi forsætisráðherra flytja ræðu. Að athöfn lokinni verður boðið upp á kaffi í Fischersetri þar sem Guðmundur G. Þórarinsson, fyrrverandi forseti Skáksambands Íslands, mun flytja ávarp.

Davíð var utanríkisráðherra þegar Fischer var gerður að íslenskum ríkisborgara. Fróðlegt verður að heyra Davíð segja söguna um aðdraganda þessarar ákvörðunar og átökin í kringum meistarann, en málið var afgreitt á Alþingi á 12 mínútum.

Séra Kristinn var hinsvegar prestur Laugardælakirkju þegar Fischer var jarðaður þar snemma morguns. Kristinn vissi ekkert um þennan atburð fyrr en hann var afstaðinn. Það varð svo hlutskipti séra Kristins að jarðsyngja meistarann nokkrum sinnum og annast loka jarðaförina eftir að Fischer var grafinn upp til að ná lífsýni úr honum.

Guðmundur G. var í þeirri öflugu sendinefnd sem sótti meistarann til Japans þar sem hann var í fangelsi. Ennfremur var Guðmundur forseti Skáksambandssins þegar einvígi aldarinnar var háð í Reykjavík árið 1972.

Allir eru velkomnir á afmælishátíðina.