Um klukkan 18:30 á laugardagskvöld barst Neyðarlínunni hjálparbeiðni frá fólki sem hafði farið á jeppa inn að Lambafelli í nágrenni við Háafoss í Skeiða- og Gnúpverjahreppi, lent þar í aurbleytu á slóðanum og fest bílinn.
Björgunarsveit Biskupstungna og Björgunarfélag Árborgar fóru af stað og voru sveitirnar komnar á vettvang rétt upp úr klukkan 22.
Nokkurn tíma tók að losa bílinn og snúa honum við, en þá vildi ekki betur til en svo að hann festist á ný. Eftir að sú festa hafði verið losuð var leiðin nokkuð greið og var bílalestin komin niður á betri veg upp úr miðnætti.